Kanyang Jo Ruok

 sm17.jpg

Assalamu’alaikum sanak di Parantauan
Jaweklah salam dari kampuang
Tapakai wakatu agak sabanta
malapeh rindu nan jo kampuang

Sajak saparo tahun mahilang
Nan surekko lah ditulih juo
dek manenggang hati Dagang
Ditundo dulu mangirimno

Sabab baa dek baitu
galak jo tangih kok batuka
bukan mambukak aib jo malu
tapi mancari kato nan bana

Buruak nak samo kito buang
elok nak dapek kito bao
disabuik saketek kisah Dagang
katiko pulang bahari raya

Kanduang pulang barami-rami
mambaok oto ciek surang
lapang dado sanangnyo hati
tabayang di rantau Dagang lah sanang

Kami paleba sapanjang jalan
kami palaweh pintu kaporo
nak sampai bana oto ka halaman
bialah “bungo” nak talendo

Sajak kami mandapek kaba
kanduang ka pulang jo oto surang
ayam jo itiak sato ka pasa
taluanyo sajo tingga di kandang

Dek ulah sanangnyo hati
barang nan indak kami adokan
batuka galang jo timah pati
untuang lai baju balangan panjang

Sapakan lamono bahari rayo
kami hiduik bak Juragan
pai ka lapau mambali lado
jo oto juo kanduang antakan

Labiah bak raso Batagak Panghulu
siang jo malam baralek gadang
lupo jo susah maso lalu
takalo Dagang ka mahilang

Babagai-bagai macam acara
malam amal sambia bagurau
panjek pinang pangguang hibua
sampai basaluang dalam lapau

Dalam acara lelang kue
salo manyelo batanyo kaba
bak cando koncek dalam embe
malompek-lompek pitih kalua

Baitu juo acara saluang
bakandak lagu mintak dipantuni
pitih bak cando ayam ka jaguang
sabalun abih alun juo baranti

Tangangak urang di lapau
sakadai urang kanduang bayiakan
kok cando iko sadonyo urang di rantau
rayo lah baa satiok bulan

Dagang di puji di mulyakan
kecek didanga kasadono
kok ado dibalakang nan mancibiakan
itu tak lain dek iri sajo

Lah sapakan Dagang di rumah
mandeh baralek satiok ari
Tamporo rampak labuahlah lanyah
kami tarimo jo suko hati

Lah tibo masonyo ka babaliak
Cuti abih toko nan tingga
tasabuik dek Dagang randang itiak
taragak pulo jo palai bada

Indak diulang duo kali
mandeh carikan salero Dagang
ampiang badadiah jo tangguli
sampai jo tapai bapuluik lamang

Apo di tabek lah babangkik
di parak tunggua lah tingga
kok lai ka ubek ibaraik sakik
ka oleh-oleh tibo di jawa

Lah baliak Dagang ka rantau
babaliak langang taraso kampuang
tibo rusuah lah tabik galau
dicaliak padi lah abih di lumbuang

Lai bana Dagang baragiah
pambali maco Dagang sabuikan
usah lai ka pambali siriah
ka garam sajo indak doh cukuik

Tapi dek Dagang lai manyabuik
takalo kabaliak malam sinayan
ka dituka Cek, Bank batutuik
dari jawa sajo nanti dikirimkan

Mandanga janji dari muluik
lupo jo hutang sabalik pinggang
isuak ko tibo urang manuntuik
dilipek duokan bayia hutang

Tapi apo ka disabuk
Di Dagang janji bukan doh hutang
Sajak jakarta ditutuik kabuk
Jo surek surek takuik malayang

Tarakhir kaba kami tarimo
kadai Dagang disita urang
untuak pambayia carteran oto
nan Dagang baok wakatu pulang

Kok bana itu nan tajadi
lah bakicuah kami kironyo
labiah rancak pulang jo padati
cukuk jo rumpuik bayia sewanyo

Kami sangko jambatan panyubarang
kayu barakuak nan kami titih
Sagitu sajo nan ambo sampaikan,
bukan baniaik ka manyingguang,

Hei… hei yo paniang wak jo dagang…
PANIAAANNNNGGGG

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: